有妹仔毋好嫁黄屋

有妹仔毋好嫁黄屋 一 有妹仔毋好嫁黃屋 屋前分狗逐 屋背分竻刺 田又遠 糞又重 碗又細 飯又鬆 一粒卵炊三碗公 東邊舀來西邊動 做人介長年 實在真辛苦 二 一歲嬌 兩歲嬌 三歲撿柴分人燒 四歲接線 五歲賡布 六歲繡花 七歲繡出牡丹花 八歲食娘家 九歲理娘家 十歲度子轉外家 三 月光華華 細妹煮茶 阿哥掇凳 人客食茶 滿姑洗身 跌忒手巾 麼人拈到 阿嫂拈到 愛還我也毋還我 大哥轉來會罵 細哥轉來會打 毋使打 毋使罵 十七十八愛行嫁 嫁到奈 嫁到黃泥崎 四 一去二三里 煙村四五家 亭台六七座 八九十枝花 一姑秀麗二姑嬌 三寸金蓮四寸腰 買得五六七盒粉 妝成八九十分妖 十九月色八分光 七姊多情盼六郎 五更四處敲三點 兩人雙雙共一床 五 古琢古琢真古拙 耕田人就掘田角 釣蝦蟆就掩嘴角 牽豬哥就兩條索 做覡公就噴牛角 爛蚊帳就蚊螫腳 爛草蓆就恁虐削 爛枕頭就刺林殼 水打田就做石坡 六 脈介有腳毋會行 脈介無腳轉京城 脈介有嘴毋會講 脈介無嘴講人聽 交椅有腳毋會行 船仔無腳轉京城 罐仔有嘴毋會講 唱片無嘴講人聽 七 脈介生來四寸長 一頭生毛一頭光 無用時節燥爽爽 用時緊刷緊出湯 牙刷生來四寸長 一頭生毛一頭光 無用時節燥爽爽 用時緊刷緊出湯 八 排排坐 唱山哥 爺打鼓 子打鑼 媳舅灶背炒田螺 點螺殼 刺到家官腳 家官呀呀叫 媳舅哈哈笑 九 樹頂鳥仔叫連連 愛討婦娘又無錢 兜張凳仔同爺講 講來講去又一年 十 月光靚靚 花羅吊頸 滿姑洗身 跌忒手巾 誰人拈到 哥拈到 愛還我也毋還我 阿母轉來會打我 阿婆轉來會救我 十一 妹妹莫叫 乖乖上轎 又有新鞋 又有新帽 又有新郎公同你聊 莫叫莫叫 乖乖上轎 又有鑼鼓 又有花轎 暗晡夜又有新郎公同你聊 十二 轉妹家 坐早車 正月去 二月轉 轉來雞嬤未生卵 牛嬤未掛胎 牛子未拖犁 十三 田脣草 開紅花 初一去 初二轉 轉來雞嬤未生卵 雞公哇哇啼 牛嬤未有胎 牛子學拖犁 十四 脈介上樹毋怕搖 脈介做出半天橋 脈介含泥無腳趾 脈介做巢一枝茅 蟻公上樹毋驚搖 蜘蛛做出半天橋 燕子含泥無腳趾 黃蜂做巢一枝茅 十五 脈介生來一點紅 脈介彎彎一把弓 脈介生來當燈吊 脈介遮等暗濛濛 日頭出來一點紅 月光彎彎一把弓 星仔生來當燈吊 豆仔打來兩條龍 十六 脈介無骨在半天 脈介無骨在身邊 脈介無骨街上賣 脈介無骨在胸前 雲仔無骨在半天 人影無骨在身邊 豆腐無骨街上賣 蚊子無骨在胸前 十七 掌牛哥仔面黃黃 三餐食飯程撈糖 你爸毋係開糖店 你姆毋係繡花娘 你哥毋係開銀行 你姊毋係觀音娘 十八 七姑星 七姊妹 打開園門來摘菜 摘一皮 留一皮 留來天光日 嫁滿姨 嫁到那 嫁到禾埕背 雞公礱殼狗踏碓 鵝凱水 鴨洗菜 狐狸燒火 貓炒菜 鴨嬤浸水,督目睡 貓摸屎物 點點睡 十九 火焰蟲 蝍蝍蟲 桃樹下 掛燈籠 燈籠光 照四方 四方暗 跌落崁 崁下一叢禾 割割丘 三擔過一籮 阿公倒掉賴阿婆 二十 阿貓牯 出門打老鼠 老鼠跌落埤塘肚 拿來煮 全家食落肚 爬床抓蓆肚屎痛 何麼介死苦 二十一 阿兵哥 落來坐 坐到黃雞膏 食黏糖 綁雞膏 去到車頭屙痢肚 轉來河邊洗屎物 二十二 伯公伯婆無殺雞無殺鵝 殺隻鴨仔像匹婆 豬肉料像楊桃 愛食你就食 毋食我也無奈何 請你食酒傍田螺 酒煞無擐到 轉去擐 做得無 二十三 兩隻老虎 兩隻老虎 一隻大 一隻小 一隻無生耳公 一隻無生鼻公 真奇怪 真奇怪 兩隻老虎 兩隻老虎 一隻公 一隻嬤 一隻無討婦娘 一隻無嫁老公 真奇怪 真奇怪