大话西游之月光宝盒粤语剧本

（黑夜，旷野） 观音：孙悟空，你本来应承如来佛祖护送你师父唐三藏去取西经嘅，而家你竟然想夹埋牛魔王嚟食咗你师父。 孙悟空：八婆！追咗我三日三夜，见你系女人，唔打你，唔好以为我怕咗你！ 唐僧：悟空，你点可以同观音姐姐噉讲嘢呢？ 悟空：咪嘈！ 唐僧：你又吓我啦！ 观音：你知唔知你犯咗弥天大罪呀？你又抢咗紫霞仙子嘅月光宝盒，分明就系想避开我啫。 悟空：既然避无可避，老孙就同你决一死战！（悟空将月光宝盒随手一抛，正好砸在唐僧头上。） 唐僧：做咩呀？ 悟空：嗯……（准备动手） 唐僧：大家唔好嬲啦，噉会犯咗嗔戒架！悟空你真系曳曳呀！我叫咗你唔好乱咁掟嘢架喇，你噉样乱咁掟嘢系唔啱啦。（咣当，悟空棍子掉在地上）嗱，话口未完，你又掟咗支棍啦！月光宝盒 系宝物嚟吖嘛！你噉乱咁掟会染污环境架，唉，又会掟亲啲小朋友。就算冇小朋友，掟亲啲花花草草，都系唔好嘅。 （悟空一把抓住唐僧手中的月光宝盒） 唐僧：做咩呀？ 悟空：放手呀！ 唐僧：你爱呀？悟空，你爱实要讲啦！做咩唔出声啫？你望住我做乜啫？虽然你咁有诚意噉望住我，我系好高兴，你都要讲架。攞去啦！你唔系真系爱吖嘛？你真系爱咩？ 悟空：我挑！（悟空一拳将唐僧打倒。） 观音：孙悟空…… 悟空：大家见啦，条友讲嘢长篇大论九唔搭八咿咿哦哦。就成日好似有一只乌蝇搂住，嗡……对唔住，唔系一只，系一扎乌蝇喺你耳仔边，一路飞入你嘅脑里便，救命啊！（悟空倒地翻滚，异常痛苦。） 悟空：于是乎我捉住只乌蝇捻爆佢嘅肚，擳佢啲肠出嚟，再将啲肠箍返佢条颈跟住用力一扯！各位，成条脷根出咗嚟。我再手起刀落哗－－！成个世界清净晒。噉你而家明白点解我要杀咗佢。 观音：悟空，你诸多藉口，你根本唔想去取西经！ 悟空：唔，讲咁多做咩？打啦！（俩人开始斗法） 悟空：老孙有金刚不坏之身，十个观世音都唔怕。（又一番斗法，观音将悟空收入甘露瓶。） 观音：今日我要替天行道！ 唐僧：徒弟有错做师父都有责任嘅！求观音姐姐放佢一条生路啦！ 观音：我唔消灭佢，冇办法同玉皇大帝交代！ 唐僧：求姐姐同玉皇大帝讲声，贫僧愿意一命赔一命！ 观音：唐三藏！ 唐僧：（合十坐地，将法杖向空中一抛）喃呒阿弥陀佛！（法杖将唐僧砸死。） （五百年后） （哑巴放风发现一个女人（春三十娘），回去禀告众人） （哑巴屁股扭来扭去向众人示意） 二当家：奖嚿肉畀佢。大家醒定啲！出便有个女人入紧嚟。 盲炳：二当家，你估会唔会系官兵呢？ 二当家：怪唔之得你叫盲炳啦，你睇唔到哑巴扭吓扭吓个箩柚咩？ 盲炳：噉扭法会唔会系生痔疮呀？ 二当家：就算系呀，得个生痔疮嘅官兵，惊佢咩呀？（众人笑，哑巴见状，亦笑） （春三十娘到） 二当家：你系咩人？ 春卅娘：难道各位睇唔出我系一个女人咩？（众人笑） 二当家的：噢，你嚟呢度做乜嘢呀？啊哈哈哈…… 春卅娘：世途险恶，北风如刀，一个弱质女子，想揾个地方歇一歇脚，洗洗身上嘅风尘。 二当家：你知唔知呢度系咩嘢地方啊？ 春卅娘：此处乌烟瘴气，各位又面目狰狞，绝唔似系一家客栈，莫非系一间黑店？ 二当家：明知系黑店你都够胆入嚟，你唔怕送羊入虎口咩？ 春卅娘：边个系羊？边个系虎？恐怕尚系言之过早。各位大爷可以系强盗，唔通我唔可以系咩？ 二当家：你到底系何方神圣？ （春三娘亮出肩上的桃花印记） 二当家：屠夫。 春卅娘：（亮出肩上的桃花印记）桃花过处，寸草不生，金钱落地，人头不保。（将铜钱扔落在各人头顶，众人惶恐） 至尊宝：春卅娘嚟五岳山做咩？呢个女魔头素来无宝不落，唔通呢度会有大买卖？（睁眼一看）你班粉肠重栋啲银喺个头做咩嘢？摆番过去！ 二当家：唔得啊！金钱落地，人头不保啊！帮主！ 至尊宝：讲咩话？二当家－－！（一把掐抓住盲炳嘅颈）你咁冇胆点做我二当家？ 盲炳：帮主，我唔系二当家！我系盲炳！佢至系二当家！（指二当家） 二当家：系啰，我至系二当家！ 至尊宝：我唔知咩，（指着旁边一人）我闹阿炳系要你惭愧？（一转身）走啊！ （追到一只狗面前）你望吓你自己，鬼鬼祟祟，冇厘大体，重学人留到披头散发！点跟我闯荡江湖呀？啊？ 二当家：帮主，我系呢度！ 至尊宝：重唔蒲头？（茫然四顾） 二当家：蒲头啦。帮主，你中咗昆仑三圣嘅七伤拳，而家伤势开始发作啦！ 至尊宝：你重好讲，嗰日唔系得你缩低个头，我使畀人打中个鼻？ 二当家：呢便呀帮主！ 盲炳：（摇头叹息）七伤拳害得帮主真系惨！ 二当家：帮主，我当日吓到自己跪低架咋！听讲话中咗七伤拳，首先系双眼斗鸡，跟住系双耳朵失聪听唔到嘢，然之后就声线失控，讲嘢走晒音，最后心脏五官爆炸，噉物死啦！帮主，你而家斗鸡得好紧要。 至尊宝：边个话我斗鸡？我只系将我视线集中喺一点改变我以往睇嘢嘅方法啫！咩呀？专登话我唔掂，想坐我个位哩？（一拳抡过去，却打空了） 二当家：（抱头蹲下）唔敢啊帮主，唔敢啊帮主！ 至尊宝：唔敢？我踩死你又唔敢？（用力踩一丛乱草）死未？喂，我踩咁多脚应酬吓都嗌两声好。 二当家：（故意地）啊！…… 至尊宝：醒定啲喇！好，大家上齐家伙架生去杀春三十娘！ 众人：啊？！ 至尊宝：怕咩呀！万事有我！ （至尊宝去杀春三十娘，春三十娘正在洗澡） 至尊宝：在下斧头帮帮主，绰号玉面飞龙至尊宝。久闻春卅娘大名，如雷贯耳，唔知卅娘驾临敝帮，有咩帮衬呢？ 春卅娘：我想喺呢个地方逗留片刻啫！ 至尊宝：唔知片刻即系几耐呢？ 春卅娘：三朝两夜－－至尊宝：噢－－ 春卅娘：亦可能系三、五、七、年！总之等到我要等嘅人出现，我就会走架嘞。 至尊宝：我怕你冇咁长命噃。 （从腰间抽出斧头欲砍三十娘，斧头却将裤带割断，裤子脱落） 春卅娘：哇！你做咩呀？ 至尊宝：冇！小完便搊（音“优”）番条裤啫！ 春卅娘：你响呢度小便？ 至尊宝：唔系你边有咁大缸水冲凉？ 春卅娘：你讲咩话？ 至尊宝：我话你冇咁长命等到你要见嘅人。 （提起斧头砍向春卅娘，却一头撞到柱子上，落入浴池中。埋伏的众人出来帮忙）（一番激战，斧头帮惨败） 至尊宝：想杀我冇咁易，问过我班兄弟先！（一回头见手下都已躲到门外，大怒）没义气呀！食碗面反碗底呀！天啊！你有本事就杀晒我哋！ 众人：饶命啊，女英雄！（纷纷跪倒） 至尊宝：蠢材！你估求佢就会放过你嘅咩？我本（拼）条命都同你死过。 春卅娘：男子膝下有黄金！既然佢哋肯求我，噉条命就暂寄喺我度。 众人：多谢女英雄！…… 春卅娘：至于你啰……咁有骨气！（至尊宝闻言马上高举双手，跪下，五体投地，拱手求饶。） 春卅娘：哼哼哼哼……！孺子可教！ （至尊宝拍手感谢。） 春卅娘：叫大家洗干净只脚板喺出便等我！（众人排成一列，双脚朝天，春三十娘逐一查看。） 春卅娘：点解有个疤嘅？ 一帮众：唔系疤嚟嘅，系污糟嚟嘅啫！ 春卅娘：即刻洗干净佢，唔系成只脚砍落嚟！ 二当家：帮主，点解要睇我哋脚板底呢？ 至尊宝：好彩净系睇脚板，唔系睇箩柚咋。 二当家：你惊啊？ 至尊宝：我唔惊，你惊啫！ 二当家：点解呀？ 至尊宝：你箩柚生咁多热痱，容乜易话你唔干净要你切咗佢架！ 二当家：你点知我箩柚？ 至尊宝：盲炳话“庄”你冲凉见到架嘛。 二当家：做咩“庄”我冲凉呀你？ 盲炳：我唔止“庄”你一个，我冚棒冷都“庄”过晒啦！ 众人：啊？！（春三十娘走到至尊宝脚前。） 春卅娘：点解咁多毛架？ 至尊宝：系呀！我身体其他地方重长得更加茂盛。点呀？系咪睇到你热血奔腾哩？（春三十娘大怒，一把扯下一撮脚毛。） 至尊宝：（痛）啊－－－－！ 春卅娘：你话边度长得重茂盛话？ 至尊宝：唔系呀！其实我净系得个头同脚板有架啫，唔知系咪生错地方呢？ 春卅娘：由今日起，不分日夜截查所有经过呢度嘅人！ 至尊宝：查咩呀？ 春卅娘：查吓佢哋脚板，如果发现有三颗痣嘅即刻我！（说完转身走了。） 二当家：帮主呀！又唔去打劫，净系睇人哋脚板底，畀啲行家知道，会唔会笑我哋变态架？ 至尊宝：明刀明枪唔够佢捻啫，暗箭佢难防嘅。今晚三更整招五毒迷魂香等佢叹吓，先奸后杀！ 二当家：好计谋！ 至尊宝：你都觉得好哩，呢招就由你去执行。 二当家：啊！咁睇得起我，唔好啩。（至尊宝突然跪倒。） 二当家：哎吖，我去系啦，唔使跪啦帮主！ 至尊宝：你估我想嘅咩！死人脚唔听使咋。 二当家：帮主，你七伤拳嘅伤势开始扩大啦！ 至尊宝：我重有对手。我唔会屈服嘅！哈哈哈！（倒立起来用双手走路，突然…）啊呀！ 二当家：帮主跌落屎坑！屙屎呀！ （至尊宝睡着，做梦回到水帘洞） 画外音：你揾到三粒痣未？ 至尊宝：做乜个个都叫我揾三粒痣嘅？ 画外音：揾到你就可以救番佢。 至尊宝：你讲咩？呢度究竟系边度呀？边个？ 至尊宝：（梦中惊醒）发梦。（听到二当家叫声）怼冧咗个贱人系嘛？（用双手走出去） 二当家：蜘蛛！蜘蛛呀！ 至尊宝：蜘蛛有乜咁架世啫？ 二当家：好大只呀！ 至尊宝：有几大只？（巨型蜘蛛出现，至尊宝夺路而逃） 至尊宝：哇！叫咗你班友平时勤啲打扫吓啦。家吓养到啲蜘蛛重大只过我！点算呢？！弊啦，咁多个唔追净系追住我，慌我唔系又衰靓仔咩？ （蜘蛛精吐出蜘蛛丝缠住至尊宝只脚） 至尊宝：做咩呀？ （一番折腾，至尊宝终于逃脱蜘蛛精魔掌） 一帮众：咩事？二当家。 二当家：帮主畀蜘蛛追呀。 一帮众：系咪呢边呀？ 二当家：唔系……嚟啦呢边！呢边有着数！ 至尊宝：有冇搞错？（睇到蜘蛛精嚟紧）救命呀！人嚟呀！我喺呢度呀！救命呀！盲炳！ （众人杀到） 二当家：前便乜都冇，大家返转头！ 一帮众：唔系！帮主嚟架！帮主…… 二当家：乜唔系曱甴嚟咩？ 一帮众：帮主嚟架。 二当家：好啊！上……（畀推出去）你班契弟。 盲炳（揸住火把）：帮主，我嚟救你。（砍段蜘蛛丝，二当家揽住蜘蛛精就行） 二当家：我而家掂嘅系咩嘢嚟吖？救到帮主啦。 至尊宝：二当家咁开心揽住嚿咩嘢走哩？ 盲炳：帮主，乜唔系抱走你咩？ 二当家：冇事啦，返屋企……阵间冲个凉，早啲瞓。今晚唔好四围去啦，好唔好？ 一帮众：放手！ 二当家：蜘蛛呀！ 至尊宝：盲炳，放火！ 盲炳：系。 至尊宝：帮拖。 （众人合力烧蜘蛛） 众人：烧佢！…… 至尊宝：揾到个靓位，要抖抖先得啦。 众人：烧佢！唔好放佢走……烧佢。 二当家：行开啦，惊乜嘢啫？ 众人：烧佢！……（蜘蛛精走咗去，众人追）喺嗰度呀……喺嗰边呀，快点去…… 二当家：呢度重有一只，呢只细只啲。重唔走？曱甴呀！ （众人追紧蜘蛛精） 众人：喺边呀？ 盲炳：好似喺嗰边！ （二当家将至尊宝误认为是蜘蛛） 二当家：得番两只爪，等我中间破你柴。死啦！ 至尊宝：哎吖…… 二当家：你唔好走。 众人：喺呢度呀。打佢！……揽住佢。打死佢！ 二当家（睇唔过眼，抢过火把）：攞嚟。冚棒冷行开！等我嚟烧佢！死啦！ （半夜二当家用迷魂香使春三十娘现出蜘蛛原形，众人合力追捕蜘蛛，一番恶斗） （众人误伤，使至尊宝下身着火，幸亏二当家用力将火踩灭。） 至尊宝：着火啦！好热！ 二当家：咁似帮主把声嘅。 至尊宝：救命！ 二当家：帮主嚟架，快啲救帮主。 至尊宝：救命！ 二当家：帮主，你太公着火！ 至尊宝：救火！攞水嚟呀…… 二当家：救火！救火！ 至尊宝：唔得……唔得…快啲…… 二当家：禾秆边救到火架？你哋行开一边啦！揸住，等我嚟！瞓低！唔好喐，我帮你踩熄佢！熄未！熄未！重唔熄啦！……踩爆你！踩爆你！ 至尊宝：哇！我唔得啦…… 二当家：熄嘞啩？ 帮众：二当家真系好嘢！ 二当家：嗱，啲火救噉踩至熄嘅嘛！死蠢！你真系！ 至尊宝：边个烧我？ 众人：（齐声）唔系我！二当家：唔知呢。众人：系佢！（指二当家） 至尊宝：估到系你嘅嘞！（走到二当家面前）我一早睇穿晒你心、肝、脾、肺、肾，系想坐我个位嘅！ 二当家：冇啊……帮主！ 盲炳：帮主对眼冇斗鸡嘅！帮主，你嘅七伤拳好番晒？ 至尊宝：系噃！点解呢？（一拳打在二当家身上） 盲炳：我明啦！医七伤拳嘅方法系要以毒攻毒，伤上加伤！ 至尊宝：有道理！有道理！ 盲炳：至于二当家啰！佢系无心之失嘅啫！如果唔系佢打你祠堂嗰吓啲病都唔会医得好咁快啦。 至尊宝：你咁维护佢，莫非你同佢有路？ 盲炳：（作亲密状）咦，人哋对你一条心！ 至尊宝：（普通话）去你妈的！你干什么？干你娘你！（一掌将盲炳推开）二当家，叫你去杀春卅娘，你搞掂未？ 二当家：嗰春卅娘系妖怪嚟，蜘蛛精呀！ 至尊宝：大佬呀！我系一个咁理性嘅人，你叫我点能够接受啲咁无稽嘅嘢得架！杀佢！ 盲炳：帮主，你就噉去呀？唔怕？ 至尊宝：怕咩？我伤好番晒，惊唔够佢打？ 二当家：好！有种！ 至尊宝：你都觉得好哩！ 二当家：帮主，你当我冇讲过啰！ 至尊宝：好啊，你是但拿把嘢冲入佢房就劈，我哋喺你后便掩护你！ 二当家：喺我后便唔得。（二当家上楼去杀春三十娘，众人离他很远） 二当家：哇！又话掩护我，行近啲好噃。 至尊宝：定啲嚟吖，我哋呢度几廿把嘢“航”住架嘛，一有乜嘢依喐就掟埋去。 二当家：噉咪连我都掟死埋。 至尊宝：傻嘅！至多咪重伤，边有死得咁易！ 二当家：噢。（一回头撞在柱子上，晕了过去） 至尊宝：（上楼）起身！（扶起二当家）喺我面前唔好诈诈谛谛，我话你听。仆你个街！（把短刀插入二当家大腿，二当家没反应），真系晕咗呀？大牛、二虎。（向楼下一看，众人已逃离）成班都废柴。（拿刀）我自己嚟。 大话周星驰站zhouxingchi.cn （至尊宝走后，二当家猛然爬起，众人惊讶） 盲炳：你头先真系诈晕架？ 二当家：（拔出腿上的短刀）呢一招叫做忍辱偷生，插一刀大髀算得咩？ 众人：噢。 二当家：（二当家背后喷血）边度漏水？ 盲炳：啊，二当家，唔系漏水，系你流血啊！ 二当家：唔使惊！唔使惊！只要我点曲池，疾宫两个穴位即时冇血流。（点自己穴道，血果然止住）（过了半晌众人见至尊宝安然无恙地走出来。） 至尊宝：（朝房中恭敬地）呢度唔算系山明水秀，但系都别有一番风貌架，两位住落相信会喜欢架，早啲抖！ （带上房门，走下楼来） 众人：帮主……点呀？系咪妖怪呀？ 至尊宝：系！重非常之咁妖添！搞到我心兵嘭兵嘭跳！（突然房门打开，一位妙龄少女（白晶晶）冲了出来。） 白晶晶：帮主请留步！（至尊宝立刻转身作风度翩翩状。） 白晶晶：师姐话，帮主你大仁大义，系侠中之侠，交上帮主你呢种朋友真系三生有幸呀，今日栋喺你班手足头上啲钱就当请大家去买酒饮啦！ 至尊宝：多谢卅娘一番美意！（少女嫣然一笑，转身入房。） 二当家：帮主，普通料嚟啫。 至尊宝：各花入各眼啫！（说罢也嫣然一笑，转身而去） 盲炳：哇－－！（大喊） 二当家：（浑身喷血）拮一嘢大髀啫，周身都竉，乜嘢意思呀？ （二妖房内） 白晶晶：师姐，做乜忽然间不辞而别走咗嚟啲穷乡僻壤，重畀班草莽之夫用迷药整到你露出原形咁失策呀？ 春卅娘：你嚟呢度做咩？ 白晶晶：噉你呢？ 春卅娘：我想行开吓散下心啫。 白晶晶：你想喺度等唐三藏出现，一尝佢长生不老之肉咋啩？你可以喺菩提老祖口中氹佢讲出呢个天机，难道我唔可以？ 春卅娘：乱噏。 白晶晶：乱噏？噉你走嚟五岳山做咩？呢度以前就叫做五指山，系只死马骝当年囚禁之地。天机泄漏咗佢会转世成人，投咗胎之后脚板底会有三粒痣，只要揾到佢就可以揾到唐三藏。师姐，我噉样讲，唔知算唔算乱噏呢？ 春卅娘：你自己想见返嗰只死马骝啫啩？ 白晶晶：见番呢个寡情薄幸嘅人又点呀！分别只不过上次佢死喺观世音手上，而今次就会死喺我手上。 春卅娘：总之一个和尚担水食，两个和尚冇水食。呢个道理你明嘅！想同我争！（现原形） 白晶晶：你估净系你识变咩？ （二当家唔小心吓出声） 春卅娘：边个？ （二当家吓得倒下） 二当家：妖怪！…… （白晶晶踎低） 春卅娘：你见到啲咩呀？ 白晶晶：冇嘢。 春卅娘：冇？噉你踎低做咩？ 白晶晶：绑返条鞋带啰。 春卅娘：如果唐僧呢个消息传咗出去，我第一个就杀咗你。 白晶晶：到时咪群妖会合五指山，向师姐讨块唐僧肉食啰。 牛：将唐三藏呢个消息报告畀大王知，一定重重打赏。 二当家（吃惊）：连只牛都开口讲嘢，今次真系白妖交集。走啦…离开呢度。噉物样走咗好冇义气。唔得，报告帮主。（冲入帮主间房）哇！帮主，原来我哋呢度五岳山，即 系以前嘅五指山。唐僧同孙悟空会喺处会合。我牛栏只牛竟然开口讲嘢。嗰两只嘢，一个有八只脚，一个个头头……（转身睇到白晶晶同埋春三十娘，吓到匿喺至尊宝身后）两位未抖嘅？ 至尊宝：讲咩嘢啫你？ 二当家：冇，你猪栏只猪乸生咗两只猪仔。一只有八…八只脚，有一个个头就四百几斤重。帮主，我哋今次发到猪头炳。以后唔好做山贼嘞！我哋净系…… 至尊宝：我哋边有养猪得架？ 二当家：我哋冇…冇养猪咩？或者我发紧梦乱噏嘢呢！噉我走啦，唔阻各位休息。 春卅娘：我哋都走。 至尊宝：顺便送埋两位姑娘出去。 二当家：唔得！ 至尊宝：两位，听日我实行派有关人等喺隔篱左右彻底搜查你哋要揾嘅人。 白晶晶（娇嗲声）：多谢帮主！ 至尊宝：唔好客气。 春卅娘：早抖帮主！行啦。 至尊宝（对二当家）：（普通话）去！去！去你妈的！ （至尊宝对白晶晶一见钟情，好生打扮却没能引起晶晶姑娘的注意。） 至尊宝：呢云死火啦，点解晶晶姑娘对我呢个造型完全冇反应嘅？没办法啦！ （二当家同埋两个妖女喺路上） 春卅娘：行！ 二当家：噢。 （春三十娘举手摸头发，二当家以为春三十娘想杀自己） 二当家：唔好杀我！……唔好杀我！我同你哋玩吓啫。 白晶晶：咁钟意玩呀？ 二当家：系呀。 白晶晶：就玩吓啦。好唔好玩呀？！ 二当家：好。 白晶晶：好就玩多次啦。重玩唔玩呀？ 二当家：我唔玩啦…… 白晶晶：头先话见到边个有八只爪呀？ 二当家：我唔记得啦…… 春卅娘：喂。 二当家：咩呀？唔好呀？ 白晶晶：噉我个头系咪噉样架？ 二当家：系呀，系呀，唔好呀。 春卅娘：系咩啫？佢都未变。 二当家：哗！而家咪变啰。 白晶晶：一刀杀咗佢。 春卅娘：唔得。 白晶晶：点唔解？ 春卅娘：我要移魂大法迷咗佢，留返嚟做我嘅卧底。 至尊宝（剃了胡须，穿上书生的服装，打开门见到盲炳）：Hi! 盲炳：鬼呀！ 白晶晶（听到叫声）：我去睇吓。 至尊宝：咁靓仔你嗌有鬼！烂泥扶唔上壁。（吐） （春三十娘做喺晕咗嘅二当家面前） 春卅娘：喂！几十岁人唔好扮嘢，唔系我会“逐忽逐忽”肉同你片出嚟呀。 二当家（立即起身）：哗！你唔系咁残忍呀？ 春卅娘：望住我。移魂大法！ （二当家中咗移魂大法） （至尊宝剃了胡须，穿上书生的服装，站在桥上等晶晶姑娘的出现。） （至尊宝干咳两声） 白晶晶：边个？ 至尊宝：长夜漫漫，无心睡眠，我以为我一个瞓唔着啫，原来晶晶姑娘，你都瞓唔着呀？ 白晶晶：系呀！唔知帮主你又为咩瞓唔着呢？ 至尊宝：就系因为晶晶姑娘你！ 白晶晶：系我？ 至尊宝；冇错！自从见到姑娘之后，我决定改过自新唔再做贼，为咗表示对姑娘你嘅诚意，我唔要再见到以前嘅我……（回头一笑）啱睇嘛？！ 白晶晶：系你只马骝精？！ 至尊宝；马骝精？ 白晶晶：孙悟空啰。 至尊宝：孙悟空？ 白晶晶：你变咗人样得架啦？ 至尊宝：人样？ 白晶晶：睇嚟我唔用三昧白骨火你都唔会认架啦。 （玉手一指，至尊宝的手马上起火） 至尊宝：哗！使唔使呀！又烧！何必呢？ 白晶晶：唔通我搞错？ 至尊宝：何必呢？（白晶晶飞身上前将火扑灭） 至尊宝：哗！你做咩用火焰弹烧我呀？ 白晶晶：你做咩无端端剃晒啲须呀？你知唔知你冇咗啲须好冇性格架？ 至尊宝：系？…… 白晶晶：文又唔得，武又唔得。你唔做山贼想做状元嗱？ 至尊宝：都有谂过吓嘅，不过。 白晶晶：悭啲啦，你学人转形象，安安份份做山贼呢份咁有前途嘅职业吖嘛！ 至尊宝：我知嘞，我会继续努力！（转身奔去） 白晶晶：好似唔似，似嗰只衰嘢！哼！（至尊宝回到房中。） 至尊宝：真失败！原来晶晶姑娘佢钟意我粗犷嘅一面！（把剃掉的胡子重新贴在脸上，窥镜自视，美甚）乱就乱啲，都总算回复几分风采！（又在脑门上贴了一丛胡子）（白晶晶月下独坐，她的思绪回到从前……） （水帘洞） 白晶晶：孙悟空，你同我躝出嚟！死马骝，喺我十八岁嗰年你话会嚟娶我，而家我等咗你三年，你同我死出嚟！ 一猴：我哋大王有啲事行开咗。佢话白姑娘嚟咗，就将呢件嘢交返畀你，重话多谢白姑娘嘅一番美意，佢就无福消受。（将玉佩扔给白晶晶） （五岳山下，牛魔王率领群魔） 牛魔王：五百年啦，五百年啦，卒之揾到唐三藏嘅踪迹啦。哈哈哈哈…… （至尊宝房中，至尊宝洗紧脚） 至尊宝（叹气）：脚板毛都剃埋，都唔知几时先生得返添架？ （五岳山顶） 菩提老祖：弊，畀嗰两只嘢到先一步添！我菩提老祖都要谂个办法通知呢班无辜嘅人。 （至尊宝洗完脚将洗脚布蒙在脸上睡着了，睡梦中又回到了水帘洞。） 画外音：你又返嚟水帘洞啦？ 至尊宝：咩话？水帘洞？你边位呀？成日带我嚟呢度做咩呀？ 画外音：冇人带你嚟，你自己要返嚟。一个人离开屋企太耐，始终都想返嚟嘅！（至尊宝刹那间仿佛看见自己变成了猴子的模样。） 至尊宝：你咪又吓我！我屋企喺五岳山第四边一百零一号地下，你搞错咗啦，听到吗？以后唔好再烦我啦，唔该！（突然至尊宝被瞎子叫醒，梦就此结束。） 大话周星驰站zhouxingchi.cn 瞎子：出发啦帮主，唔系就迟到嘅啦。 至尊宝：出咩发呀？你想点呀？ 瞎子：打劫呀帮主。 至尊宝：边个够胆嚟打劫呀？ 瞎子：我哋去打劫人哋呀！ 至尊宝：去咪去！怕咗你啦！ 众人：打劫呀……打劫脚板…… 轿内人：打劫咩嘢话？ 一仆人：脚板，老爷。 轿内人：我冇脚架，噉点呀？ （至尊宝正襟危坐） 至尊宝：望咩呀？剃净咗块面靓仔咗，妒忌呀？ 二当家：清清哋几好呀。 其他人：系呀…… 至尊宝：妒忌就妒忌啦！你班友……菩提子？ （至尊宝房，盲炳入嚟） 盲炳：帮主，菩提子洗干净啦。 至尊宝：出返去。 盲炳：晚饭都准备好啦。 至尊宝：出去。 （盲炳悻悻出去） 至尊宝（听到响声）：边个？ 菩提老祖：我咪你带返嚟嗰揪菩提子啰！ 至尊宝：你系菩提子？ 菩提老祖：唔系，我系菩提老祖！ 至尊宝：乜“唔提老母”呀？ 菩提老祖：你讲粗口，我系菩提老祖，我系神仙。我化作菩提子嚟救你架。 至尊宝：你挞咗我揪菩提子，重唔提老母？ 菩提老祖：嗰两个女人，系妖怪嚟嘅。如果你唔信呢，揾我个照妖镜一照呢你就明白晒！ 至尊宝：我妖老母块镜！你系咪挞咗我揪菩提子？ 菩提老祖：我冇呀！…… 至尊宝：我揪菩提子喺边？ 菩提老祖：我咪你嗰揪菩提子啰！ 至尊宝：大声啲！ 菩提老祖：我咪你嗰揪菩提子啰！ 至尊宝：点解你唔系苹果？要系菩提子？ 菩提老祖：你唔好以为我唔够你打！我唔想伤及无辜咋。嚟吖！ （有人敲门） 至尊宝：有排你伤呀。 （至尊宝去开门，见到白晶晶） 至尊宝：晶晶姑娘。 白晶晶：哗！帮主笔须好粗犷呀！ 至尊宝：得唔得呀？ 白晶晶：得呀！点解头先兵兵嘭嘭嘅？ 至尊宝：啱啱打紧揪菩提子。（无意中在照妖镜中看到白晶晶的狰狞面目，恐惧） 白晶晶：打菩提子都有嘅。食饭啦。 至尊宝：食饭啦。食饭好。 白晶晶：好喱。 至尊宝：今日嗰个月光咁靓，不如…… 白晶晶：月光，冇呀？ 至尊宝：咁大个月光你都睇唔到，睇真少少啦。 白晶晶：天都未黑，点会有月光。你讲…… （白晶晶悻悻离去） （斧头帮去查看过路人的脚底板，至尊宝捡到一串葡萄，却原来是菩提老祖化身前来救他，并给了他一把照妖镜去照白晶晶，至尊宝吓得魂不附体，回到房间后……） 至尊宝：边个？边个老母？边个老母？ 菩提老祖：我变咗提子呀。 至尊宝：你喺边呀？ 菩提老祖：喺你裤浪。 至尊宝：哗！咁大搊挂喺度！ 菩提老祖：呢揪你嘅，我喺你后面！ （至尊宝从后腰上发现了葡萄。） 至尊宝：见番你真系好啊！ 菩提老祖：你而家信喇？ 至尊宝：我信啦……喂，点解呢度会有妖怪架？ 菩提老祖：蠢材呀，我话你知啦。（从里屋走出来，摘了至尊宝手上一颗葡萄吃）呢班妖精就喺度等唐三藏重现人间嘅。 至尊宝：唐三藏重现人间？ 菩提老祖：五百年前孙悟空畀观音大士所消灭，佢师父唐三藏为咗救佢，用自己嘅性命换取孙悟空一次重生嘅机会，希望呢只马骝仔改邪归正。 至尊宝：唐三藏点解要喺呢度出现，你重未答我？ 菩提老祖：没错，唐三藏当年为咗普渡众生不怕千辛万苦去取西经，希望藉此经书嚟感化世人，满天神佛都畀佢呢种精神所感动。玉皇大帝有见于此，就畀个机会孙悟空转世，安排佢两师徒今世喺呢度重逢，继续完成取西经嘅使命。你而家明白点解咁多妖精喺呢度出现啦。 至尊宝：唔怪得一路以嚟我都发着同一个恶梦，喺一片漆黑孤独嘅环境里头，一对一对非常之咸湿嘅眼睛系噉望住我，令到我鬼死咁唔好意思，就系你呢挺眼神，有几次重望到我有啲面红添。原来注定我今日撞妖！ 菩提老祖：系呀！你今日真系撞妖！ （菩提老祖拿出乾坤袋同隐身符） （菩提老祖帮至尊宝捉妖，正斗间牛魔王来了，至尊宝想冒充孙悟空求得牛魔王的保护，不料牛魔王却是为了孙悟空勾引铁扇公主来找他算帐的。蜘蛛精和白骨精听说他是孙悟空又反过来保护他） 菩提老祖：嗱，呢度有两个乾坤袋，一叠隐身符。你一贴咗度符喺身哩，佢就睇唔到你架喇。吼佢唔觉意你就一笠笠落佢个头嗰度。嗱我喺后便掩护你。 至尊宝：哗！你句对白不嬲我讲架。 菩提老祖：你同边个讲？ 至尊宝（指向二当家）：同佢啰。 二当家（将柴推入火）：好呃！等我帮你呢。 至尊宝：冇得顶！不愧为我好兄弟。嗱，你而家出去叫晒啲手足入嚟，每人畀度符佢。我返去菩提老祖度攞埋乾坤袋，夹手夹脚捉妖精。 二当家：冇问题。 至尊宝：好兄弟。（疑惑）今日你啲眼神好似咁…… 二当家：淫吖嘛。 至尊宝：系哩。 二当家（烧晒啲隐身符）：我实帮你嘅。 （白晶晶同埋春三十娘食紧饭） 一帮众（端上菜）：两位请慢用！ （一角） 盲炳：冇办法，帮主吩咐咋。（二当家走嚟）二当家。 （二当家以异样嘅眼神望春卅娘） 盲炳：通知其他人，帮主揾我哋呀。 （春卅娘会意，喺碗底摸出一张纸仔，上便写住“隱身符”三个字） 一帮众：行啦…… 白晶晶（见有情况）：师姐。 春卅娘：我哋不动声色，睇佢哋想点。 （斧头帮所有人打赤肋出场，白晶晶惊诧） 春卅娘（镇静）：师妹，饮酒啦！ （众人慢慢逼近春卅娘同白晶晶） 白晶晶：师姐，你都饮。 （一帮众除咗条裤，白晶晶喷出一口酒） 春卅娘：你做咩嘢？ 白晶晶：我有啲醉，瞓阵先。 一帮众：唔使惊，睇唔到架。 春卅娘：唔饮得唔好学人饮啦，真失礼。 （众人忽然往后望，至尊宝出场，佢一摇头，二当家出场，跳咗一段草裙舞） 二当家：真系睇唔到。 至尊宝：你不嬲都睇唔到嘅啦。行。 白晶晶：帮主咁耐都未嚟嘅。 春卅娘：唔知呢。 白晶晶：又话有烧鸡食。 众人（轻声）：行开。帮主！着火啦。 （至尊宝想除咗条裤） 众人：唔除得。 （一轮特写镜头） （至尊宝瞓低，帮众踩熄火，至尊宝松了一口气） 春卅娘（将一碗酒洒出，至尊宝身上又着晒火）：好还钱，僆仔！ 白晶晶：讲还钱使乜发烂渣？ 春卅娘：发你唔起呀，借钱唔使还呀？ 白晶晶：讲呀，我几时挣你钱呀？你挣我钱就真。 春卅娘：我挣你？ 白晶晶：唔记得呢。 春卅娘：系呀…… 白晶晶：冇记性。 春卅娘：你真系犀利，对唔住呀。 （帮众又踩熄火） 白晶晶（将油灯推出，至尊宝身上又着晒火）：僆仔，到你好还钱！ 春卅娘：使唔使发咁大烂渣？ 白晶晶：唔还，毁你容都得啊。 春卅娘：喂，我上个月咪还咗畀你啰。 白晶晶：还咗？啊系噃，还咗噃。 春卅娘：你老了，你冇记性呀。算啦，头先又系我唔啱先嘅。 二当家（拿住一把刀喺至尊宝面前）：切佢啦，都侬晒嘞。 至尊宝：香口啲啫！总好过冇。明刀明枪同佢捻过！现身啦！兄弟。两只妖怪出嚟受死。（摸摸身上）个乾坤袋呢？喂！ 二当家（出现喺两妖女身后）：乾坤袋喺度，主人，佢哋想陷害你吖。 至尊宝：反骨仔，你出卖我哋。 （两妖女笑） 至尊宝：不过今日出卖得我，听日一样可以出卖番你。 春卅娘：系咩？ 二当家（变成菩提老祖把声，将乾坤袋笠喺两妖女头上，两妖女入咗乾坤袋）：系呀！（笑）我菩提老祖为咗伏妖除魔，除埋条底裤都要啦。帮主果然够眼光，二当家真系有问题。 至尊宝：平时条友仔嗌佢做嘢，梗推三推四嘅。今次咁顺摊，梗有景轰啦。拖佢出嚟。 盲炳：系。 一帮众：行……行呀。 二当家：放咗佢。放咗佢。放咗佢。 盲炳：快啲。 一帮众：跪低。 至尊宝：你条“木契”，今晚我就劏咗你当烧猪食。 众：好！ 菩提老祖：噉又唔怪得佢嘅。佢不过系受咗嗰两个妖女嘅移魂大法啫。 二当家：放咗我！如果唔系我叫我主人杀咗你哋。 至尊宝：重驳嘴你。（睇到旺财咬紧一条绳）咦，旺财，乜你咬住条绳好似咁面善噉嘅？ 菩提老祖（提醒）：咪系我绑乾坤袋条绳嚟啰。 （两妖女从乾坤袋中逃出） 春卅娘：死老鬼，天堂有路你唔走，地狱无门闯进来。 菩提老祖（拎起至尊宝）：嚟吖，等我抻死你个托世孙悟空，你就永远都揾唔到唐三藏架嘞。 春卅娘：咩话？佢系孙悟空？ 菩提老祖：嚟吖！快啲认孙悟空吖，唔系就一镬熟架嘞。 白晶晶：佢唔系孙悟空！佢连我三味白骨火都顶唔住，点会系孙悟空吖！ 至尊宝：岂有此理！噉嘅天机你都泄漏出嚟嘅。系咪？呢便呀。你重算系神仙嚟嘅你，攞只手嚟吖。（同菩提老祖换咗一只手）过…分…呀你。你以为我真系怕你三味白骨火呀？你再烧多次睇吓？ 菩提老祖：唔系吖哗？ 白晶晶：好呀！ （菩提老祖成只手着晒火） 至尊宝：我唔怕嘞！系咪呀！？ 菩提老祖：系噃！ 至尊宝：我孙悟空就一路摆只手喺度畀你烧。惊都未惊过呀！都唔怕笑死人。侬嘞。 春卅娘：真系烧到侬晒都冇事。 至尊宝：放手！（甩咗菩提老祖）而家知我坚架啦。好投降啦。我重有成班兄弟，再加个神仙。（问菩提老祖）喂，你去边呀？ 菩提老祖：我揾日会同你报仇架嘞。 至尊宝：哗！连神仙都咁冇义气。噉唔使问啦，我成班兄弟梗过晒嗰边啦。 众人（企喺两妖女身后）：系呀！帮主！ 至尊宝：呢班契弟。 白晶晶：你就系嗰个负心人？你琴晚重呃我！ 春卅娘：咪就系嗰只马骝精啰。师妹嫁唔出，都因为你啫。 盲炳：捉住至尊宝！上！ 至尊宝：咪嚟呀。 盲炳：帮主走呀。 （众人和两女激战） 至尊宝：唔好杀我啲兄弟啊！ （好多人诈死） （至尊宝同两妖女拚命） 盲炳（揸住斧想劈白晶晶）：帮主！ （盲炳畀白晶晶抛上天） 至尊宝：有我喺度唔使怕，盲炳。 （至尊宝接空） 至尊宝：对唔住，盲炳！计错数，行少咗一步。你唔会怪我吖嘛？ 盲炳：我呢一世人都盲累累做人。 至尊宝：我知。 盲炳：最有眼光……就系跟住帮主你嘞！（吐血，头一歪） 至尊宝：同你搏命！（拿起一碌木打春卅娘头，头冇事，木断咗） 春卅娘（掐住至尊宝颈）：死过未你。 白晶晶：唔舍得杀个负心人。 春卅娘：你重帮住佢。 白晶晶：重要靠佢揾唐僧。 春卅娘：带佢番盘丝洞。 白晶晶（一掌将春卅娘打倒）：师姐，一个和尚担水食，两个和尚冇水食。原来呢个道理你唔明。 春卅娘：你打伤咗我，都唔见得一定有水食吖。睇吓你自己只掌。 白晶晶：吓！黑寡妇。 春卅娘：你中咗我盘丝软甲嘅毒。七日之内如果冇我嘅解药，你就会毒气攻心而死。 白晶晶（跪低求饶）：师姐，我以后唔敢啦。 春卅娘：躝开！ （菩提老祖踉踉跄跄跑返嚟） 至尊宝：终于都良心发现啦你。 菩提老祖：唔系呀！出面嚟咗只猛嘢呀。 春卅娘：出去睇吓。 菩提老祖：你哋去边呀？唔好呀！ 春卅娘、白晶晶：牛魔王都嚟咗？ （盲炳起身，畀一个人拉住） 盲炳：你都系诈死呀？ 一帮众：我都系呀。 盲炳：快啲走吖，走吖。 （牛魔王企定） 牛魔王：菩提老祖，今日你唔将唐三藏交出嚟，死路一条。 菩提老祖：你同我讲咁多做咩？你问托世孙悟空吖嘛？ 牛魔王：我结拜细佬孙悟空？喺边度呀？ 至尊宝：（心谂）咦，呢件猛料原来就系孙悟空嘅结拜大佬。今次有救嘞。（军礼）细佬就系结拜大佬你嘅结拜细佬孙悟空托世嘞。 牛魔王：你？ 至尊宝：系嘞！就系细佬嘞。 牛魔王：我杀咗你呢个勾二嫂嘅反骨仔！ （欲杀至尊宝，畀两女阻住） 牛魔王：何方妖女？报上名来。 春卅娘、白晶晶：盘丝大仙座下大弟子（白晶晶：）白骨精、（春卅娘：）蜘蛛精。 牛魔王：我识你哋祖师爷盘丝大仙嗰阵，你两个都唔知喺边度呀？今日竟然够胆同我放肆…… 春卅娘、白晶晶：变…… 牛魔王：今日边个够胆挡我嘅，我就杀边个。 白晶晶：领教我嘅白骨鞭啦！ （白晶晶同牛魔王展开激战） 春卅娘：神龙盘丝。 菩提老祖、至尊宝：撇啦，重睇。 牛魔王：雕虫小技。 （至尊宝趁乱溜走，却看见刚才被“打死”的瞎子等人也在逃命……） 至尊宝：盲炳乜你重未死嘅咩？ 瞎子：我哋正话揸流摊架咋！ 至尊宝：冇得顶呀你。（转身走） 二当家：喂，唔好走啊…… 大话周星驰站zhouxingchi.cn 牛魔王：睇吓你哋重有乜嘢法宝？ 白晶晶：死牛精！ 春卅娘：走。 菩提老祖：畀佢整伤条菩提根，起码练番一百几廿年先至可以再同佢捻过。 （春三十娘和白晶晶打不过牛魔王，只好带至尊宝和二当家躲进盘丝洞。白晶晶与春三十娘反目成仇，混乱中春三十娘将“催情大法”施在了二当家身上，至尊宝带受伤的白晶晶逃到一座悬崖上。） （盘丝洞内） 二当家：起身嘞。 至尊宝：做咩你？ 二当家：主人要见你。 至尊宝：咩嘢地方嚟架？ 二当家：盘丝洞。 至尊宝：盘丝洞？ 二当家：系！我主人系盘丝大仙座下大弟子蜘蛛精。呢度唔系盘丝洞系咩呀？ 至尊宝：盘丝洞？ 二当家：行啦！死马骝。 至尊宝：喂，你傻咗？我系你帮主呀。死马骝！ 二当家：我就系傻咗，你重诈谛。你喺山寨已经承认咗自己系齐天大圣架嘞嘛。行啦。 至尊宝：你揾次醒啲吖。我焗住认架咋嘛。唔信你用个照妖镜睇吓我系咪？ 二当家：照妖镜？ （二当家用照妖镜照至尊宝） 至尊宝：嗱，睇到啦嘛？睇到啦。清楚冇？ （攞返照妖镜照自己，系镜中睇到只猪） 二当家：呃我！呢个根本就唔系照妖镜。猪呀！ （白晶晶同春卅娘喺埋一齐） 白晶晶（哀求）：师姐，当可怜吓我啦。 春卅娘：你急咩啫？喺呢段时间你听听话话，我担保你冇事。 二当家：主人！主人呀！主人呀！死马骝嚟咗啦。 春卅娘：唐三藏究竟响边嗱？马骝精。 至尊宝：好大嘅误会呀各位。呢个大到点吖嗱？我静静鸡讲吖，我确系属猴，不过查实就唔系马骝精嚟嘅。讲都费事呀！我照妖镜又有，咩嘢都有。（攞出照妖镜）你攞嚟照吓吖。 二当家：假嘅，假嘅。 至尊宝：假嘅你都够胆…… 春卅娘：嗱！你唔好再扮嘢呀。 至尊宝：如果我真系孙悟空，我使企喺度畀你咬住只手咩？一个关斗打上天，一人屙涿屎喺你哋天灵盖啦。 春卅娘：你而家未变真身啫，到时你慌你唔屙呀。点呀？师妹。心痛呀？ 白晶晶：唔系呀。 春卅娘：唔系？ 白晶晶：我唔会再为呢个男人心痛。 春卅娘：你呃我！ 白晶晶：师姐，我冇呃你。 春卅娘：冇呃我嘅？噉你一剑杀咗佢吖。 至尊宝：喂！ 白晶晶：杀咗佢？噉你唔想揾唐三藏？ 春卅娘：想呀！不过我唔信你会一剑杀咗佢。 二当家：猪嘴…… 白晶晶： 春卅娘：畀把剑佢！ （二当家想畀至尊宝） 春卅娘（嘴一努）：佢呀！ 二当家：知道。 二当家（剑畀白晶晶）：杀佢。（白晶晶抽出剑喺二当家大髀片咗一嘢）你片咗我大髀一嘢呀。 白晶晶：我有心嘅。 二当家：噉你开张单嚟我畀番钱你吖？ 白晶晶：唔使客气。（冲向春卅娘）杀你至真！ （白晶晶同春卅娘激战） 春卅娘：贱人，早知你对只死马骝余情未了嘞。 白晶晶：废话少讲，攞你命。 （白晶晶擸起至尊宝就走） 春卅娘（对二当家）：冇嘢嘛？ 二当家：咁紧张嘅时候都重咁关心我。冇办法啦，我爱定你一个。 （白晶晶、至尊宝两人跑入一个石室、石门落下） 至尊宝：喺出便，度门顶唔顶得住架？ 白晶晶：度门系祖师爷用万年金刚岩做架。行开。（走埋一便） 春卅娘（喺出便）：师妹，你唔记得佢以前点样对你呀？佢欺骗感情，背弃婚约。你原本同赤炼神君有段大好嘅姻缘，都系畀佢叉镬架咋。佢而家未有本事，到佢回复真身之后，咪又唔理你。 至尊宝：讲完未呀？八婆。 春卅娘：死马骝，你叫我八婆！ 至尊宝：吹呀，八婆。 春卅娘：你咪懒得敕，以为匿埋喺里面好安全。今晚系十五月圆之夜，到时佢尸变你又知死！ 至尊宝：我吓大架！八婆。 （牛魔王地头） 牛魔王（转身）：咩话？ 一手下：大王，呢度有几千个山头，山洞又多。唔知边个系盘丝洞嘅入口？ 其他人（附和）：系呀…… 牛魔王：多！多得我身上嘅牛虱，同我揾！ （石室内） 至尊宝：喂，你冇事吖吗？ 春卅娘（喺出便）：里面点呀？死得未呀？ 至尊宝：你死我哋都未死呀，我哋乜事都冇呀。晶晶姑娘不知几靓女，我就照旧靓仔得不得了。我哋不知几靓仔靓女。 （石室出便） 二当家（端上菜）：食饭啦三十娘。 （石室内） 至尊宝：呀……救命呀。尸变呀。 春卅娘：开门呀！ 至尊宝：开唔到呀。 春卅娘：嘴对嘴过啲阳气畀佢，噉可以阻止到佢发围嘅。 （门开） （至尊宝扑进春卅娘怀内，惊魂未定） 白晶晶（着住至尊宝件衫）：吓，吓死我！ 春卅娘：师妹，你斗我唔过嘅。 至尊宝（着住白晶晶件衫，抬头）：系咩？ （白晶晶一只手揸住春卅娘颈） 白晶晶（威胁）：你一喐亲我就捵断你条颈。攞条匙嚟！困佢喺里便。 至尊宝：一日到黑咁恨入去呀啦，恨到呀你。（推春卅娘入去石室并扭动锁匙，门门徐徐下降）再见！（睇到白晶晶现原形，吓到即刻捐返入去石室） （石室内） 至尊宝：冤冤相报何时了。或者我建议噉样啦，打时打，唔好打面…… （春卅娘举拳欲打至尊宝，至尊宝连忙跑开） 至尊宝：边度都唔好打，唔该。 （石室外） 二当家（捧着一只熟鸡）：重有只鸡呀卅娘。（唔见卅娘，走去石室门口，听到春卅娘喺里便） （石室内） 春卅娘：走？ 至尊宝：啊，唔好呀。 （突然间白晶晶出现喺二当家面前，二当家掟咗只鸡撒腿就跑） （白晶晶扑埋嚟） 二当家（感到奇怪）：一锡佢就唔喐嘅？唔好数呀。 春卅娘：好！你重唔开门呀嘛。噉就一拍两散，我将你个心上人先奸后杀。 二当家：唔好呀。 春卅娘：１…… （二当家跑去攞锁匙开门） 春卅娘：２…… （二当家将个锁匙掟入个锁匙竉） 二当家：中。 春卅娘：３…… （门开） 春卅娘：催情大法。 二当家：千祈唔好呀。（扑到春卅娘身上，二当家中招） （至尊宝趁乱逃出石室） 至尊宝（拉起白晶晶）：走呀。 （石室内） 春卅娘：你做咩呀？ 二当家：我打咗个冷震，好过瘾呀。 春卅娘：你响我身上打咗个冷震？ 二当家：系呀。 春卅娘：该煨啰。 （山脚下白晶晶同至尊宝换返自己嘅衫） 至尊宝（发现白晶晶已经上咗山）：如果唔系妖怪你话几好！ （山上） 至尊宝：你中嘅毒越嚟越深。再唔解，死啰。 白晶晶：解咗又点吖？唔开心，长生不死都冇用。开心，就算剩番几日命都已经足够。 至尊宝：如果我话你听我唔系孙悟空，你会点？ 白晶晶：我会杀咗你！ 至尊宝：我的而且确唔系佢。呢块真系照妖镜嚟架，你照吓就知架喇。 白晶晶：咩话？你唔系佢？ 至尊宝：唔系。 白晶晶：你唔怕我杀咗你？ 至尊宝：怕！但系冇办法，因为我唔想你望住我，但系谂住另外一个。 白晶晶：我就杀咗你。 至尊宝：嚟吖！正如你话斋做人唔开心就算要咁长命都冇用架。 白晶晶：哇－－！（大喊） （至尊宝想上前安慰，又恐唐突佳人，不料晶晶却主动投怀送抱，俩人感情冲动，一触即发。） 至尊宝：嚟啦！ 白晶晶：嚟咪嚟！ （俩人宽衣解带。） 至尊宝：小喇叭！边个绑到个结咁叉实？ 白晶晶：等我嚟！（解着解着突然推开至尊宝，大哭起来） 至尊宝：对唔住，我唔系有心架，我见你扯到咁恒，我谂住配合吓架咋，我虽然唔系正人君子，都未至于乘人之危啊！ 白晶晶：日光日白唔惯呀，天黑先喇。 至尊宝：天黑好，天光好，你随时需要，随时吩咐啦。由今日开始，我一路陪住你。 （众牛揾紧唐三藏） 众牛：揾唔揾到呀？继续揾啦。 （石室内，春卅娘、二当家对坐，二当家面露笑意） 春卅娘（流泪）：（心谂）天冇眼啰，我春卅娘貌美如花，竟然同一个咁肉酸嘅男人有咗。 二当家：三十娘。 春卅娘：收声呀！我唔系为咗呢个肚，我一掌打死你添！ 二当家：唔该。（凑近春卅娘） 春卅娘：咁开心做咩？话你知吖……第日佢大咗你唔好认系佢嘅……咩添。 二当家：噉？噉我认佢嘅咩呀？ 春卅娘：奶妈啰。 二当家：吓？男人老狗点做奶妈？ 春卅娘：我哋带大佢架嘛。你唔讲，佢点知奶妈男人唔做得啫？ 二当家：噉物系。 （白晶晶奄奄一息） 白晶晶：我揾到个好似你嘅人嘞。 （至尊宝嚟到盘丝洞请春三十娘相救，石室门开） 春卅娘（看到至尊宝）：系你？（埋去伸手欲打至尊宝） 至尊宝：想唔想知唐三藏喺边度？（春卅娘止步） 春卅娘（打咗至尊宝一巴）：想。 至尊宝（回敬两巴掌）：想就唔好还手。要食唐僧肉系要付出多少代价，值得嘅！如果你肯畀解药我救白晶晶嘅话，我就话你知唐三藏喺边。 春卅娘：又系为咗个贱人。 至尊宝：唔顺嗱？ 春卅娘：奶妈。 二当家（张开双手）：奶妈锡番你。 （春卅娘狂殴二当家，打完转身） 春卅娘：我顺啦，听日出发啦。（行出去） 二当家（伏喺地度，好痛苦噉话）：为咗爱情，就算你真系毁我容都系值得嘅。（潸然泪下） （第二天，春卅娘骑马狂奔，至尊宝喺后便追赶） 春卅娘：快啲啦，系咪想救人架？ 至尊宝：畀我上马得架。 （白晶晶醒番，唔见至尊宝） 白晶晶：至尊宝。 （春卅娘骑马狂奔，至尊宝喺后便追赶） 春卅娘：你再唔快啲，师妹唔掂架嘞。 至尊宝：你畀我……上马得架。 （春卅娘同至尊宝卒之赶到，但系白晶晶唔见咗） 春卅娘（揸住把遮）：唔见咗。 白晶晶（绝望）：全部都呃我嘅。（闭目欲跳崖） 菩提老祖（再对面山峰爬起）：过埋呢个山就返去菩提洞嘞。（见到白晶晶跳崖）唔系吖哇？（同白晶晶一同跳落去） （至尊宝四周揾白晶晶，喺地度执到白晶晶嘅玉佩） 至尊宝：梗系以为我走咗唔理佢。 春卅娘（埋嚟）：喂，重要揾几耐呀？ 至尊宝：晶晶。 春卅娘：一定系毒发碌咗落崖啰。 至尊宝：一日最衰都系你。点解畀我瞓一晚啫？应该漏夜赶嚟架嘛。点解唔打多鞭只马啫？我跟到嘛，重大把有得快嘅嘛。你唔使我讲唐三藏啲嘢畀你听，我咩都唔知啦。（欲走） 春卅娘（拉返至尊宝）：哎吖，你自己衰咗重发我烂渣！ （牛魔王一手下跑去牛魔王那里报告消息） 牛魔王：咩话？ 手下：大王，我哋发现白晶晶晕倒山崖，菩提老祖重伤不治。 牛魔王：天助我也！ （至尊宝被春三十娘软禁） （盘丝洞） （春卅娘将至尊宝推入石室） 春卅娘：你唔讲出嚟，呢一世都唔使旨意出去。（关门） 至尊宝：睬你都傻架。 （至尊宝一个鱼跃，将门用头顶住） 至尊宝：（谂）挞地都唔系好硬咋。今次冇死啦。 （牛魔王治疗白晶晶的伤） 牛魔王：盖世魔王，神功护体。我而家医番好你嘅伤，但系你要带我入盘丝洞揾只马骝精托世。噉迟早揾到唐三藏，到时食唐僧肉唔少得你嗰份。如果唔系我就要你死得比而家痛苦十倍。 （至尊宝掘紧地） 至尊宝：我掘隧道，惊未？ （掘到一嚿嘢） 至尊宝（读上便啲字）：借助月亮光华可以穿梭时空。咩嘢嚟呢？（攞起嚿嘢，翻转，睇到上面有一行梵文）般若波罗密，梵文嚟嗰。（又翻转，又睇到字）月光宝盒。盘丝大仙留低嘅宝物？ （突然一股强大的力量将至尊宝吸入洞内） 牛魔王（医好咗白晶晶）：即刻带我去盘丝洞。 （盘丝洞，春卅娘嘅孩子就快出世） 春卅娘：个肚做乜突然间咁痛架呢？ （水帘洞） 至尊宝：啜咗我去边度呀？咁多机关架？！越行越湿嘅？ （看到一群猴仔） 猴仔：大王你返嚟嗱？！ 至尊宝（揉揉双眼，证明自己没看错）：撞鬼啦呢镬。 （盘丝洞） （二当家为春卅娘接生） 春卅娘：你扮到鬼五马六噉嘅样，做咩啫？ 二当家：我见你成日揾阿唐三藏，噉我特登扮佢嚟氹你开心啰。 春卅娘：哎吖，你做咩嘢？ 二当家：你生仔吖嘛，我帮你接生啰。个头出咗嚟！ 春卅娘：系？点解我都唔知嘅？ 二当家：呢度哩。 春卅娘：唔系呀，嗰个系我膝头嚟架。 二当家：怪唔知冇头发啦。（听到声响）有人嚟紧。 春卅娘：有人嚟呀。 二当家：匿埋先，避避先…… 春卅娘（揸住二当家头发）：好痛呀。 二当家：我都好痛呀。唔该你放开你只手先呀！ （水帘洞） （至尊宝在洞中找到一幅图画，图画自行点燃飘在半空。） 至尊宝：观世音。 画外音：孙悟空，你当年罪恶滔天，希望你今生会大彻大悟，痛改前非！ 至尊宝：边个讲嘢？ 画外音：五百年前你师父唐三藏为咗赎你一命，牺牲咗佢自己，玉皇大帝专登安排五百年后你重投人间，希望你学得你师父一样能够舍己为人，将你过往嘅一切罪孽洗清，只要你肯自愿带上金刚圈，即 系肯改过自新，噉就可以成为法力无边嘅齐天大圣，到时你就要负起取西经嘅重任，将历史改变，不过从此人间一切与你冇关，再唔可以有半点情欲半点留恋，一心要皈依我佛。你未变成真正嘅孙悟空托世，只 系因为你未遇上嗰个畀三颗痣你嘅人，当你遇到佢之后你嘅一生就会改变。 至尊宝：同我讲呀？唔系同我讲吖嘛？认错人嗱！黐孖筋！（跑出水帘洞） 大话周星驰站zhouxingchi.cn （盘丝洞） 春卅娘：放手呀。 二当家：你够整到我好痛，你放手先啦。岂有此理，真系。你冷静啲好吗？ 春卅娘：唔得。 二当家：冷静，淡定。冷静呀。 春卅娘：痛呀。 二当家：我够好痛架。去买餸啦你。 春卅娘： （牛魔王同白晶晶行紧） 白晶晶：小心机关！（抢咗旁人兵器松咗去） 牛魔王（怒）：追。 （二当家同春卅娘） 春卅娘：走呀。快啲过嚟捉住我呀。 二当家（掩住春卅娘口）：捉住啦，生啦……（婴儿出世） 牛魔王（听到婴儿哭啼声）：唐三藏出咗世啦，快啲揾。 众手下：系…… （二当家抱佢个仔畀春卅娘睇） 二当家：仔呀！似你多过似我。我觉得做唔做神仙，食唔食到唐僧肉都唔系咁紧要。最重要嘅就系我哋以后能够好好哋噉生活，凑大个仔，唔好好似我噉做山贼。你咁想要唐僧，不如就叫个仔做三藏啦。 （白晶晶蒲头） 二当家（双手张开，护住春卅娘）：边个？ 白晶晶：今次都算冤家路窄啦。 春卅娘：你想点呀？ 白晶晶（睇到春卅娘抱住一个苏虾仔）：个细路你架？ 春卅娘：系呀！系我同至尊宝生嘅。 （二当家脸一沉，面露苦色，心酸） 白晶晶：你讲咩话？ 春卅娘：奶妈，话畀佢知啫。讲啦嘛。 二当家：系！系佢同至尊宝生嘅。 （白晶晶晕倒） 春卅娘（拉起二当家）：走。 （撞到牛魔王） 牛魔王：睇你走得去边？ 二当家（上手护住春卅娘跟前）：唔使惊，我保护你。 春卅娘：你咩新丝萝卜皮，几时轮到你嚟保护我？躝开。（冲出去同牛魔王较量）抱我个仔走。 二当家：我爱你呀。哗！我唔系同你讲呀。（牛魔王过嚟） 牛魔王：畀唐三藏我。 二当家：呢个我个仔嚟嘅，唔系唐三藏嚟呀。救命呀。救命呀…… （春卅娘闻声赶到，架开牛魔王） 二当家：你咁肉紧我，我愿意为你精尽人亡。 春卅娘：Honey!带我仔走先。 二当家：唔走。 春卅娘：走。 二当家：卅娘。 （至尊宝跑进石室） 至尊宝（抖咗一口气）：好彩走得返出嚟。（见到白晶晶伏喺一嚿大石度）晶晶。（拾起地上一把刀，明白晒） （春卅娘畀打倒在地） 二当家：老婆！ 春卅娘：龟缩大法。（捐入牛魔王个肚，狂砍牛魔王内脏）我片你啲内脏，问你点挡？同你打番个结呀。 牛魔王：原神出壳。（灵魂捐入自己肉身）八婆，你唔好再踩（yai）我条肠呀。 春卅娘：我系要踩（yai）呀。 （至尊宝想用月光宝盒回到过去救晶晶。这时春三十娘与牛魔王在一动不动的牛魔王肉身内斗法……） 二当家：老婆！老婆！喂！喂！我老婆喺入边呀，唔该你帮帮手啊！ 至尊宝：唔得闲啦！ 二当家：唔该呀！ （春卅娘出咗嚟） 二当家：出嚟呀？！ 春卅娘：走。 至尊宝（跑出洞外）：系咪真系可以时光倒流啊？ （春卅娘同二当家跑到盘丝洞口） 春卅娘：你走先啦！走！ 二当家：我唔走！要走一齐走！ 春卅娘（转身揸住二当家衣襟）：听住，好好哋凑大我哋个仔。（将二当家推出门外）走呀！ 二当家：我哋个仔！娘子！ 春卅娘（将剑架在颈上）：你再唔走，我即刻死喺你面前！ 二当家：吓！唔好啊。 （断龙石徐徐落下） 二当家：娘子。娘子……娘子…… 春卅娘（畀打倒喺地度）：相公！ 二当家：娘子啊！ （断龙石合拢将二人分开。） 至尊宝（焦急地跪喺地上）：月光快啲出嚟呀！ 二当家：娘子！ 至尊宝：好！般若……乜Ｑ嘢呀？唔记得咗呀！（睇睇月光宝盒）般若波罗密！般若波罗密！…… （红光一闪，至尊宝突然消失。） 二当家（惊诧）：哇！升仙啦！ （至尊宝穿梭时空回到洞中。） 至尊宝：呢镬杰啦！真系时光倒流啊！喂！等埋等埋！ （白晶晶已倒地身亡。） 至尊宝：凶手走得咁快？再嚟！ 二当家：老…老婆！老婆！喂！我老婆？ 至尊宝：你老婆就出嚟啦，定啲嚟啦。 二当家：我都未讲完，你点知呢？真系出嚟。 春卅娘：走呀。 （断龙石徐徐落下） 二当家：娘子，娘子…… 至尊宝：波若波罗密！（再次穿梭时空） 二当家（惊诧）：哇，又升仙啦！点解我讲又？ 至尊宝：（返到洞中）等埋啊，等埋啊。（又见晶晶倒地身亡）再嚟！ （向洞外跑去） 二当家：老婆！老婆！ 至尊宝：警告你咪烦我！ 二当家：喂……做乜嘢要叫我咪烦你？重要警告我啊！ 至尊宝：你好谮呀！仆街！ 二当家：系哩！我都觉得自己好谮啊。点解呀？我好惊呀！ （这时春三十娘从牛魔王体内飞出。） 二当家：出嚟啦？！ 春三十娘：走！ （…………） 二当家：娘子！娘子！……娘子呀！ 至尊宝：般若般罗密！……（再次穿梭时空） 二当家：吆！你咪一样咁谮。 至尊宝：（回到洞中）唔好呀！（又见晶晶倒地身亡）好攰！（向洞外跑去） 二当家：老婆！老婆！ （至尊宝一言不发走到二当家面前。） 至尊宝：攞嚟呀！（从二当家手中接过孩子）