黄子华栋笃笑《唔黐线 唔正常》剧透

黄子华栋笃笑《唔黐线唔正常》剧透黃子華棟篤笑《唔黐線唔正常》劇透一連11場《黃子華棟篤笑唔黐線唔正常》昨晚開鑼，台下星光熠熠，但首場難免有蝦碌，子華一度錯呼鄭中基為鄭敬基、尷尬得忘記話題，繼而又被自己的啜核口才弄致笑到收唔到聲，難怪當晚觀眾更是笑聲震天大讚句句到肉，子華以自嘲、嘲諷，笑盡現今各種現象，為打工仔、學生、男女發聲，有男神之稱的他還妙數另一人氣男神「都min俊c」，就連何鴻燊、半澤直樹、倉井空和多位政要都難逃其口。 行行都有吞pop嘅精英泌尿科醫生又點呢？ 子華講理想嘅工作:「『家家有本難念的經，行行都有吞pop嘅精英』!點解呢，因為真係做每一行，每一份工都好辛苦，就算你話理想嘅工作都係好辛苦，做醫生好理想，好辛苦，成日唔夠瞓，因為病同分手一樣，係好冇時間觀念架嘛。你聽朝早6點半要返工，條友4點同你講『我要分手呀!』…你申請咗幾個月，拎咗大假，聽朝一早去旅行，盲腸炎『陳醫生，你瞓緊覺呀?我盲腸炎呀，我唔係想問你幾時施手術，想問呢盲腸炎呢，可唔可以食buffet呀?可唔可以游水呀?踩單車?最緊要會唔會影響我視力?盲腸喎!有啲嘢盲咗喎!』好多病人最大嘅問題係呢一度(個腦)，所以我老友Benjamin，唔係阿強，細個立志要做醫生，做腦科醫生，好勤力讀書，佢考到入去，但腦科滿額，佢只能做泌尿科。」 子華續說:「事實上泌尿系統係人類最複雜嘅一個系統嚟o架，因為你身體其他部份出問題，見到醫生會直接講『身體見邊度有問題呢?』『冇咩呀』『先生你係咪尿頻呀』『唔係呀，好正常呀』『先生，你尿出血?』『冇冇冇』『先生你即係咩問題都冇』『咁又唔可以咁講』講咗半日，『先生你係咪要偉哥呀!』『可以要幾多?金『先生你想要幾多?』『盡要!』前幾日佢話阿爺問我拎偉哥，成百歲，你比佢?…我緊係唔俾佢!問題係我去廁所時佢去我櫃桶拎咗，我阿爺反應:『唔係我食嘅，龜食嘅，龜唔生蛋』我話阿爺隻龜好大年紀，『痴線嘅你，龜會有大年紀嘅咩』，我係今日都俾佢搞到我好混亂，龜係咪唔會老嘅呢，諗起嚟又係喎，未見過龜會死架喎，你邊有養隻龜會死架，你試下俾啲偉哥佢食丫嘛。」 「係好奇怪架，泌尿系統嘅病人唔係一般嘅病人，你身體咁多器官唔會亂咁搞佢架嘛，你唔會得閒冇事，聽講耳膜係好薄架嘛(作狀搞耳膜)真係好薄!Marvelous!你係唔會架嘛，但係人類會對佢個泌尿系統做盡各種實驗，Benjamin比過一份X光片我睇，係一個人飲咗罐可樂，係連埋個罐飲咗，再清淅啲，係用咗一個廣東嘅旅遊名勝，肛門飲左，大約半尺到，個人解釋係，佢唔係有心飲架喎，佢係唔知邊個，擺罐可樂喺張椅度，佢一坐底就飲咗啦，但係有位叫Benjamin都大開眼戒嘅病人入急症，因為佢尿道係比啲嘢塞住咗，各位係尿道唔係彌敦道，係隔離個條街，窄好多，用內窺鏡一睇，有粒豆咁，有個人形，係孫悟空，齊天大聖，當年被壓喺五指山下已經夠折墮，而家zip喺條尿道中間，Benjamin要做嘅就係用激光打碎佢，係一隻豬!搞咩呀?動物園呀?先生究竟係發生咩事?千真萬確，『我今年犯太歲，我要zip太歲呀，zip隻玉豬囉，隻玉豬唔出返嚟，咪請大聖爺囉，其實預埋唐僧添架啦』一個醫生，一份咁理想嘅工作，你有冇諗過你遇到啲病人係『冇問題…隻龜有問題』Benjamin唔介意，積極研究緊將個電筒放喺尿道度，咁啲人痾夜尿，咪唔使開燈囉!」 (環保篇)吐篤痰罰十萬蚊仲有咩人夠膽吐？ 《環保1》 全世界認同一件事係需要環保，香港咁分裂都冇人有異議，香港係唔夠環保，明知唔夠環保都係做唔到，好難，點解？以前香港好多人好興吐痰，o依家好少，點解呢？點解，因為當年你行入任何一間食肆就會見到四句詩，夠年紀同我一齊背出嚟:「隨地吐痰乞人憎罰款二千有可能傳播肺朥由此起衛生法例要遵行」當年吐一篤痰罰二千蚊，二千蚊調整今日通脹等於今日十萬蚊，你諗下吐篤痰十萬蚊仲有冇人吐?有…揸法拉利嗰啲，唔係畀得起錢，係走得快。 被人話吐痰點拆？「體液公共分享」？ 《環保2》 你唔係揸法拉利，你冇資格吐痰，只係有資格起痰，成日喺街見到啲阿叔度「…吘…吘…吘，啲橙點賣呀？」佢冇嘢出嚟，好似變魔術咁，吘吘吘，呢個魔術慳十萬蚊，今日你唔環保，你用膠袋要畀幾多錢，要畀五毫子，若果當年吐痰係罰五毫子，今日大家唔駛行入嚟，大家係跣入嚟，你坐樓上嗰啲好危險o架，你咳一咳你就落咗嚟啦，點解呀，我畀咗兩舊水呢一行吐痰呀，自己友O嚟嚟嚟，客咩氣，你吐一篤，我畀咗兩舊水，都唔會吐，因為唔係只係錢問題，係形象都好有問題，係乞人憎呀，今日啲人唔環保，你點鬧佢呀，唔環保﹗係咪，即係你吐痰，被人話你吐痰，哎呀原來呀吐痰呀，家母教我呢啲叫做體液公共分享，原來吐痰好Mano架，你吐痰被人話你吐痰，你唔環保被人話你唔環保，文學上叫白描，個細佬白描，描咗等於冇描，我哋為咗令大家明白事情嚴重性，整番幾句詩，子華吟環保詩「用襯膠袋正契弟成疊紙巾扮富貴水浸眼眉等住做你大熱天時流鼻涕」，唔環保正契弟。 (環保篇)子華教你契弟英文可以點譯 《環保3》: 全世界冇人會敢鬧一個唔環保嘅人，點解？因為契弟好難翻譯，我唔信你哋有邊個會識，thisisnotmybrother，notabadbrother，isakaibrother，即係出面啲人鬧點解你咁kai，就係呢度嚟，kaibrother，咁女人唔環保咁點，哎呀陳小姐點解你咁契弟呀，又好似唔係好啱咁，點解全世界冇人咁鬧啲唔環保嘅人，各位因為嘆開嘅國家係想繼續嘆，冇嘆開就更加想嘆，我寫咗首新詩，想喺度同大家分享下，子華以朗誦技巧講「美國夜靜一個男人，喺一個水塘，小一個便，男人放水，水塘放晒水塘嘅水，是水有毒，亦或是人有毒，中國十萬萬人檯上食飯，一桶桶地下溝油，吃得快，長得大，你浪費水，我循環油，人不怕毒，天怕無毒。」呢個新聞係美國，你啲美國佬飲水都飲得咁招積，一個水塘疴一篤尿就放晒喎。 (工作熱情篇)對老闆講「十倍奉還」預咗唔撈？ 《工作熱情》篇: 「一套日本電視劇，一個打工仔點解咁受歡迎，因為到佢有需要時候，佢就會同老闆講，我會以牙還牙，十倍奉還，其實你夠膽做呢個樣，你做乜都得啦。 你同你老闆講最兇恨係點呀，阿伯母幾時得閒呀，都係呢啲，我真係有老友同老闆講過，正正因為呢啲，証明對工作冇熱愛，講得出呢句都預咗唔Do，勢估唔到有個老闆同你講家母擇緊日子睇緊通勝，係唔會呀嘛。 以牙還牙，十倍奉還，係另一個層次，點解半澤直樹會講呢句說話，佢喺銀行打工，邊度打工不重要，佢可以去麥當勞打工，佢老闆可以問佢點解次次斟奶昔都斟一半，因為冇人需要咁大杯奶昔，飲一半已經好夠營養，另一半只係為公司營養，公司冇營養你食屎呀，我喺呢度打工唔係為咗我同為公司利益，我同公司都係社會一部份，有責任去服務呢個社會，邊個阻撓我，我就會以牙還牙，十倍奉還，麥當勞以牙還牙，搵家鄉雞打我呀。 《工作熱情2》 點解半澤有呢個熱情，銀行借錢，佢父親以前問銀行借錢借唔到，吊頸而死，所以佢嘅工作熱情因為有殺父之仇，你哋邊個對工作冇熱情，就睇下世伯喺邊度走，就做邊行，咁好難，我爸爸係試衫時跣親，咁你去做sales，包唔會對啲客人黑口黑面，阿伯你幾環保，齋試唔買，你當呢度酒店呀，駛唔駛叫埋roomservice，你一定唔會，慢慢試到啱為止，當做運動，唔得閒行山，咪試下衫，正所謂上得山多終遇虎，試得衫多收屁股。」 (政客思維篇上)叻人最多可以諗到幾多步？ 子華騷的《政客思維》篇，鋪排有點長，敬請耐心收睇: 《政客思維1》 「我80年代時型到呢，我當期時好多嘢諗，我唔流汗，只係流漿，腦嗰啲，有一日我好多嘢諗行過條細街，多嘢諗自然行得慢啲，忽然身邊有架小型家庭車喪砵我，好似失散好耐，「重逢…重逢…重逢」喪砵我，我二話不說行埋車度，開車門話唔好講，出嚟。我喺嗰剎那開始後悔，佢出嚟做乜嘢呢？嗰下我幻想畫面入面係我好型，我開佢車門，下一個畫面就係我屋企嘆冷氣飲維他奶回味開佢車門好型咁。 開佢車門佢真係會行出嚟，你咁高大嘅人坐架咁細嘅車，係咪犯咗某啲交通條例，同埋四人車，出咗五人，咁肯定犯法，呢個係你喎，肯定係畀綠帽你戴，你三個仔都唔似你，咁老積，你咁後生，你幾條友唔駛化妝，就可以做省港奇兵。你開我門你想點呀？咁你砵我你又想點呀？我砵你費事撞死你呀？我冇死到咪開你門。原則上咁辯論可以講半個鐘。 《政客思維2》 「呢件事對我影響好大，直至今日都係，就咁睇好似係一時衝動自取其辱，但係呢個世界係冇一時衝動，我係計過佢，佢望到佢一架四人家庭車，一男一女坐車頭，咁肯定係爸爸媽媽，後面應該係仔仔女女，爸爸要走出車，梗係全家車呼天搶地拉住爸爸嗌唔好。 咁同埋我不單計佢，我都計過自己，我當日著住皮褸，當時皮褸成吋厚，係著住會覺得被車撞係唔會死，打應該唔會痛，冇諗佢會群毆，除非集中上面打落嚟，集中喺頭度。 我係有計過佢，但計得唔足夠，我睇佢車頭就開佢車門，呢啲叫「資訊與行動不相稱」，對我嚟講一時衝動自取其辱冇所謂，但點解咁大衝擊，因為到今日我都懷疑，我人生好多決定都係睇到車頭開人車門，結果係大腳省入自己龍門。」 《政客思維3》 「我哋個腦呀，各位，專家話有個特點就係懶，唔諗就係唔諗，佢最想就係收工，當你冇諗時，佢就同你講你諗咗啦，見到一部小型車，你著皮褸，見到坦克車都唔驚啦，同埋我趕住收工，開門啦，如果佢唔係咁趕收工，就算我見到一部小型家庭車，好清晰見到一家四口，我會諗個爸爸載住一家人都喪砵我呢，個人一定有好多問題。 世界棋王可以諗到七步，但係一般人喺趕收工先影響下就只會諗一步，卒一步將軍，咁幾時篤，問得好，人篤你就篤，你能夠諗到兩步自步自篤，呢啲好高級，阿強話佢諗到三步，我知，連篤三步，阿強話行三步係篤卒，唔算，再篤過，唔算，再篤。 諗到四步係人類極限，係我發現，何鴻燊有四個老婆，不丹國王有四個老婆，回教畀你四個老婆，我認識最風流男人最多都係四個老婆，點解，因為有四個老婆，一起身就要諗四步，你諗時間都死，一個拜七日，每日先分一日，冇咗四日，剩餘四個人分，每人有四分三日，夜晚瞓到四點就要起身搬竇，搬到下一家朝早九點食宵夜，晏就一點半就又要搬家，一路咁，四步人類極限。」 (科技篇)電腦唔夠用？點解要用平板電腦？ 《科技改變生活1》 「好多人話21世紀人腦會被淘汰，錯…21世紀係平板電腦年代，點解有電腦唔夠，要用平板電腦呢，（子華做出踎廁所睇平板電腦動作），係咪，就係令要入到廁所都要睇得方便，係咪，o依家啲人入廁所好似入少林寺咁，我唔過關我唔會出番嚟，阿強佢唔過關佢都會出番嚟，冇電呀，所以阿強好醒目，喺個馬桶邊整個插蘇制，年三十晚入去，人日都未出番嚟，阿強佢唔駛過關過咁耐呀，你都黐線，我咁冇文化咩，我開影展呀，咩影展，杜棋峯作品展，7741套喺晒度。 人類喺21世紀發明部萬能電腦，就係喺唯一可以靜落嚟空間都填滿埋佢，你地喺上面嗰啲我知道你哋都唔係睇緊o架，係咪呀。可能下面都係咁，好唔好睇，乜你唔係睇緊咩，好多人問我嘢要覆呀，到底好唔好睇呀？我唔知呀，我睇緊佢上一套。」 《科技改變生活2》 「當人冇空間，就可以有幾鈍得幾鈍，科技係為滿足人需要，人係需要乜Q，唔係講粗口呀，唔係IQ，唔係EQ，21世紀係鈍Q，好簡單，大家一齊去追一個女仔，個女仔同你講對你冇好感，一個敏感嘅人，你死得，冇好感咪算，仲要永遠冇好感，咁即係太陽爆咗，全宇宙好冰凍，我送個暖爐畀你，你都對我冇好感。 但係你係一個鈍Q高嘅人，我永遠對你都冇好感呀，我永遠都Feel唔到你對我冇好感呀。太陽爆咗你送個暖爐畀我都唔會要呀，你會唔會諗多咗呢？太陽爆咗去邊度買暖爐呀？ 「走呀….」「唔緊要走去邊？」「我唔想再見到你。」 「咁好易，我去你後面咪得，我知點解想我去你後面，因為每個幸福女人後面都有一個男人」 大家今日記住呢三句 「鈍Q低喺以少局為重，鈍Q高係以大局為重，鈍Q爆棚係以雀局為重」 (生產力篇)點解耶穌復活有假放死咗冇假放呢？ 子華騷噚晚又秒論生產力:「啲人生仔就放前四後六，放幾個月假，死老豆就放一日，係咪？點解，所有都係講生產力，你個仔生出嚟將來有生產力，你阿爸冇將來。 唔係咁絕情呀？我識我老豆幾十年，個仔唔係我生出嚟，我真係唔知佢貴姓。怕你呀，提早放日端午節，屈原個仔死老豆有幾多日放呀？都係端午節一日呀，佢仲要包糭去賣，有生產力添，你諗清楚，生產力好緊要。耶穌出世有聖誕節，因為有生產力，咪放假囉，耶穌死係冇假放，然後耶穌復活又去放假，復活節囉。 然後耶穌升天又冇假，升天係咩意思，退休移民，邊有生產力，佢仲要唔買機票退咗休，唔搭飛機都搭程的士去飛機場呀，咁就走咗，幾蚊雞生意都唔畀人做，邊有生產力。」 (愛情篇)夫妻間最大第三者竟然係個仔？ 《愛情1》 「香港有個女明星失戀時，走去拍咗三套喜劇，失戀時候最想係喊，但係失戀拍喜劇係唔準喊，即刻收聲，唔止，要即刻笑，做到都嚇死你，肯定鬼上身，失戀做喜劇難過鬼上身，唔準喊，即刻同我收聲同我笑，最緊要係即刻令我笑，你點攪…跟住子華唱「從前有隻小駝鳥，喊喊下就鬼上身了。」 所以人冇鈍Q可唔可以有愛情，唔鈍又有冇愛情。」 《愛情2》 「愛情最激烈就係當對方同你講「NO，冇你份」，而村上春樹講過一百分的女孩(應為《遇見100%女孩》)，當你喺街上見到一百分的女孩，你喺度諗唔講就冇，一百分一百分，，跟住一百分就走咗啦，咁點知佢係一百分，因為佢走咗。 大家唔肯承認愛情就同股票一樣，你未入嗰時就不停升，你知啦，你一擁有…有冇咁準呀﹗ 所以你有一百分的女孩，有一百分的男孩，世界係冇一百分的伴侶，因為一百分的伴侶就係一百分的開始扣分，如果仲有一唔承認開始就係扣分，我有一個邏輯的鐵証，兩人相愛都唔想有第三者，大家好愛好愛，但係點解你想生仔呢？黐線仔點解唔係第三者，佢唔係人呀？呢個第三者霸你哋好多時間，仲多過你有多個第三者，你真係有個第三者一個禮拜偷食三次好未？你知道偷食斷斷不能變成正餐，如果唔係餐餐食兩餐，呢個第三者日日食六餐，當佢食嘅時候，你分分鐘冇得食。 一男一女梗要生仔，點解呢？當一男一女就好快FEEL到呢個世界得你得我，呢個遊戲係玩唔到好耐。 跟住佢高歌「每一個晚上，我都跟你吔飯，長期叉燒番茄湯，含住菜睇到，你狼吞噴飯，好在有生啤…GOOGOOGOOGOOGOO」 跟住子華話自己入高咗KEY，點解鄭敬基唔收住佢，佢即時喺台上問鄭敬基喺邊度，Ronald呀，哎呀…係鄭中基先啱，令全場爆笑。 (愛情篇)子華唔識邊個蒼井空全場噓爆 「相處真係好困難，你係兩種唔同物種相處，有冇聽過一個名言，「保圍鈎魚台生擒蒼井空」，我唔記得係生擒定活捉，都係嗰隻啦，釣魚台是中國的，蒼井空是世界的，其實冇人想講蒼井空是我上架床的。 有冇人唔知蒼井空係邊個，我諗全場得我一個唔知，我真係我發誓…（全場噓） 台下啲男士噓，我同你哋唔同，我唔需要自己去搵o架。（掌聲四起） 我第一次聽蒼井空，我以為係一種雀，聽個名好似某種鷹咁，保圍釣魚台要活捉一樣嘢，咁釣魚台有咩啫，咪以為係雀嚟囉。 你試諗一諗各位女仕，o依家講緊國土完整咁大問題，可能會打仗，一講出嚟好多男人就諗起野味，生擒活捉…咪死咗話你聽，唔係每一個男人咁。」 (愛情篇)都敏俊C都被抽:17歲臉孔400歲財富 《愛情4》 之前有個港女連打14巴，就可能覺得條仔係扮人，想打佢真身出嚟，而今年我哋知道咩真身有資格同女性相處，我哋今年知係都敏俊C，有冇人話唔知，唔係維他命C，係來自嗰粒星星，一個四百歲嘅外星人，有四百歲智慧，最緊要係有四百歲財富，佢間屋靚到呀，佢一定供起咗，係咪先，供咗四百年，未供完應該都係五毫子一個月，我都供得起，你有四百歲，折墜到得到嗽口盅，都係古碗呀。 唔係呢啲唔重要，佢有超能力，佢有四百歲成熟，有十七歲臉孔，都唔係最緊要，佢係唔能夠接觸人類體液，佢接個吻就好似中風咁，咁所以佢一定唔會做，一日唔做，一日都一百分。幾荒謬…一個諗住粒星星，一個諗住釣魚台，一個點到即止，一個生擒活捉。 《愛情5》 當然呢個可能好過時男女關係，我唔係晒命，上年我好大壓力，因為套劇被人罷睇，我都要去減壓，我去酒吧，想去飲杯酒，我都有壓力，係咪睇唔出，我都係人。 咁我想飲杯，無耐隔離坐咗個女仕，坐喺吧檯度，坐咗唔夠十幾秒，咁我梗係跨張少少，咁佢就問我，你嚟呢度做乜，我答飲杯嘢…做咩。 行啦…（全場叫） 我跟住呆左，跟住佢就再問我你嚟呢度仲乜嘢呀﹗我即刻望一望我係咪入咗鴨店，我叫你行你仲唔行，佢跟住話女人同男人，得一樣嘢…（跟住子華模仿該女人動作，雙手磨拳大力拍打動作） 跟住我幻想我跟佢行，我就會入到一間房，個房中間有一張擂台，佢就一嘢跳上擂台，除好似李小龍件衫一樣，放馬過嚟，我睇你有幾多斤兩，我真係唔知你要上得擂台，你要有隨意肌，大家明我唔解釋。 我唔知佢有幾多斤兩，我肯定冇斤，幾多兩就唔知。 你明唔明呀，今時今日你啲男人諗住點生擒女人，但係啲女人諗住生擒放血，你認識女性有幾多，你認識人性又有幾多？ 《愛情6》 大家知唔知香港離婚率係有三、四成，即係以後有三檔人結婚，有一檔唔駛去，嘥咗一條魚，美國離婚率係百分之五十，你鍾意賭大細，過美國，唔抽水。 2009年喺中國有一百二十萬人結婚，二百萬人離婚，你諗下你去一間戲院，你睇到裏面走出嚟嘅人，多過入去嘅人一倍，有冇咁猛呀？係咪要打番場齋做場法事，以後結婚唔駛結婚音樂，唔係啦，新人交換戒指…在旁不停唸咒，新人接吻，桃木劍…不停耍，你哋唔駛理我哋繼續接吻，好猛，最猛係好多離過婚嘅父母，都好想自己仔女結婚，咩意思，隻嘢上你身後，我賴咗嘢，到你啦。 (制度篇)愛情最大陷阱係…..一見鍾情？ 子華話:「呢個係制度覺醒年代，制度係咩意思，制度即係遊戲，遊戲有啲人玩得好叻，有啲人玩得唔叻，係以前會叫啲遊戲玩得唔叻嘅人努力啲勤力啲玩得叻啲，但o依家啲人好醒，我唔學，係制度係遊戲有問題，要改係遊戲。 喺愛情入面我見過人玩得叻，若果有拍手嚟聽下，我回水畀你，（全場拍掌），我諗你係聽錯咗係被愛情玩得你好叻，愛情要嚟玩嘅咩? 經濟上有叫貧富懸殊，喺愛情上我見大部份都係愛情邊緣掙扎，所以點解見到90歲愛侶，拖住手全球都會感動呀，嘩咁老都仲有積蓄嘅，啲後生已經執緊紙皮，所以我覺得愛情係需要好大改革，今日開始唔好再講愛，應該講鍚，鍚比起愛有兩大好處，首先鍚可以避免愛最大陷阱就係一見鍾情，十個著有九個人一見就鍾意，咩意思，就係鍾意一個你唔識嘅人，係咪。係見人見車就開人車門，開人車門就話我愛你呀。鍚就有叫一見就鍚，會否過份啲一見就鍚，正所謂唔熟唔鍚。 第二大好處，你愛一個人，你問佢愛唔愛我，你答「幾o架。」你衰咗，係咪，當佢問你愛唔愛我，其實係問你對我可以去得幾盡，你話幾o架，即係唔盡，唔盡即係唔愛。 鍚就唔同，鍚嘅制度就寛鬆好多，唔同階級，媽媽問你鍚Daddy多啲定媽媽多啲，你可以答睇你鍚我多啲定細佬多啲。可以鍚多一個人，媽媽永遠唔會講，咩話，你鍚Daddy多啲，你從來都冇鍚過我，從來唔會咁。」 （獲取更多猛料，请關注微信：hkchannel）