喀什文学

3 كەلمىگەچ ئابدۇغوپۇرجان راخمان ئايرال شېئىرى چالمىدىم سازنى بۈگۈن سەن جان نىگارىم كەلمىگەچ، چىن دىلىم ھەسرەتكە تولدى ،شۇ دىلخۇمارىم كەلمىگەچ. گۈل قولۇم بولدى قوپال،نۇر كۆزلىرىم گوياكى چۆل ، ئول كۆڭۈل غەشلىكتە قالدى كۈتكەن باھارىم كەلمىگەچ. كۈلمىدىم ئاغزىم ئېچىپ،قاھ-قاھ قىلىپ ،گۈللەر كۆرۈپ، ياشلىقىم كۈلپەتتە قالدى ،شۇ قىبلىگاھىم كەلمىگەچ . قۇيۇلار ياشلار كۆزۈمدىن دەم توختىماي قان ئارلىشىپ، ھۆسنىنى ئاچماي ئۆتەر گۈل رەيھان خۇمارىم كەلمىگەچ. كۆككە باقسام كۆز قىسىپ يۇلتۇز مېنى زاڭلىق ئىتۇر، مەنە كەم بولدى كۈنۈمدە،سەن مېھرىبانىم كەلمىگەچ. بولىمەن مەجبۇر ھامان بىل،چېكىپ ئازاب،مىسكىن ياشاپ، نە ئامال شۇ شاد كۈلۈشكە بۇلبۇل نىگارىم كەلمىگەچ. مەيلىغۇ ئابدۇغوپۇرجان راخمان ئايرال شېئىرى رەنجىمە كۆڭلۈم بىراۋدىن تانسا سەندىن مەيلىغۇ، شان-شەرەپ ئابروينى دەپ چانسا سەندىن مەيلىغۇ. ئوت بولۇپ كۆيسۇن ئەبەدكە سەندىكى ئارزۇ-تىلەك، بول جەسۇر! قوللاش مەدەتلەر قالسا سەندىن مەيلىغۇ. كۈتمىگىن ئىچ ئاغرىتىش تاغلار بېشىڭغا چۈشسىمۇ، سەن ئۈچۈن كۆيگەن يۈرەكلەر يانسا سەندىن مەيلىغۇ. ئەگمە باش كۈلپەت -جاپاغا ،دەپلا قوي:‹ئۇ بىر سىناق›، جاننى شۇ قات-قات رىيازەت ئالسا سەندىن مەيلىغۇ. يولى كەڭ بىلگىن ئەزەلدىن بۇ ھايات ئوكيانىنىڭ، تىل تۇرۇپ ئەردەك ياشاپ،قان ئاقسا سەندىن مەيلىغۇ. تېرىشىپ تاغلار، داۋان ئاش ،پەن-بىلىم دۇنياسىدا، ئاڭلا ئەي ئايرال ئىلىڭگە، نەپ ياقسا سەندىن مەيلىغۇ. ★ ئايرال مېنىڭ تەخەللۇسىم ئىدى. مەن ئۆزۈم ئۆزۈممەن ئەمەس باشقىسى ئابدۇغوپۇرجان راخمان ئايرال شېئىرى ھەق ئېزدەپ جەنۇپتىن كۈلۈپ كېلىمەن، قايسى ھەق قايسى ئەمەس ئوبدان بىلىمەن، ۋاي ئۇنداق،ۋاي بۇنداق دېمەڭلار مېنى، ھەق سۆيەر دوستلارغا دوسىت بوپ كىلىمەن. ــــ خاتىرەمدىن مەن ئۆزۈم ئۆزۈممەن ئەمەس باشقىسى، ئەمەسمەن ناھەققە قەدەم باسقۇچى، يېگىنىم ھالال تۇز،سۈيۈم ئەركەك سۇ، ھەم ئەمەس ناھەقتىن قورقۇپ قاچقۇچى. غورۇر بار، ۋىجدان بار،ئىرادەممۇ بار، بۇلاردۇر تايانچى مەنزىللىرىمنىڭ، شۇ ۋەجە يولۇمدىن كەتمەيمەن ئېزىپ، شەنىگە ھاياتلىق غەزەللىرىمنىڭ. كەمتەرمەن كىبردىن پەقەتلا يىراق، غەلبەمگە پو ئېتىپ سالمايمەن داۋراڭ، جىمغورمۇ ئەمەسمەن لېكىن قىلمايمەن، ئۆزگىنىڭ ئارقىدىن تېپىپ گەپ –پاراڭ. كۆڭلۈم ئاق،نىيىتىم دۇرۇس ھەرزامان، يامانلار ئىزىغا باسمايمەن ئاياغ، ئۈمىدىم ياخشىلىق بابىدا كۆكلەپ، مسكىن دىللارغا ياقسام شام- چىراغ. غاپىلمەن بارچىدىن ئىشەنچىم بىلەن، بولمايدۇ ھېچ يەردە ئۇشبۇ دىلىم خار. ياشايمەن پەخىرلىك ئىلكىدە چۈنكى، تاڭلاردا تاغلارغا بەرگەن ۋەدەم بار. باقىمەن ھاياتقا ئۈمىدلىك بىلەن، ئېيىتقىنىم باشقا ئەمەس ۋىجدان ناخشىسى، ئويلاپمۇ يۈرمەڭلار بۇ زادى كىم دەپ، مەن ئۆزۈم ئۆزۈممەن ئەمەس باشقىسى. تەرجىمان: شىنجاڭ ئۇنېۋېرسىتىتى فىلولوگىيە ئىنىستىتۇتى جۇڭگو ئازسانلىق مىللەتلەر تىل - ئەدەبىيات كەسپىنىڭ 2012-يىللىق ماگېستىر ئاسپىرانتى، ئالاقىلىشىش نۇمۇرى: 13070415698 ئېلخەت: qq. com @474480691، ئادرېس:شىنجاڭ ئۇيغۇر ئاپتونوم رايونى ئۈرۈمچى شەھرى غالىبىيەت يولى 14-نۇمۇر،پوچتا نۇمۇرى:830046